මාතර නගරයේ සිට කඹුරුපිටිය – කොටපොල මාර්ගයේ කි.මී. 33 ක් ඊසාන දිගින් මුලටියන ප්‍රාදේශීය සභා බල ප්‍රදේශය  පිහිටා ඇති අතර, බල ප්‍රදේශයේ  විශාලත්වය 115.3 km²කි. උතුරින් පස්ගොඩ හා කටුවන ප්‍රාදේශීය සභා  බල ප්‍රදේශයෙන්ද , දකුණින් කඹුරුපිටිය ප්‍රාදේශීය සභා  බල ප්‍රදේශයෙන්ද, නැගෙනහිරින් හම්බන්තොට දිස්ත්‍රික් මායිම සහ හක්මණ ප්‍රාදේශීය සභා  බල ප්‍රදේශයෙන්ද, බටහිරින් අකුරැස්ස හා පිටබැද්දර ප්‍රාදේශීය සභා  බල ප්‍රදේශයෙන්ද මායිම්ව‍ මෙම ප්‍රාදේශීය සභා බල ප්‍රදේශය පිහිටා ඇත. මාතර දිස්ත්‍රික් භූමි ප්‍රමාණයෙන් 8.99% ක් මුලටියන බල ප්‍රදේශය  සතුව ඇත. මාතර දීස්ත්‍රික්කයේ  ප්‍රාදේශීය ලේකම් කොට්ඨාස 16  අතුරින් විශාලත්වය අතින් මුලටියන කොට්ඨාසය පස්වන ස්ථානය ගනි.

කොට්ඨාශයේ භු විෂමතාවය පිළිබදව සැලකිමේ දී දකුණින් හා නිරිත දිගට වන්නට මුහුදු මට්ටමේ සිට අඩි 100 ක් පමණ උසින් ආරම්භ වේ. උතුර හා වයඹ දිගට වන්නට අඩි 800- 1000 දක්වා සිඝ්‍ර නැග්මක් පෙන්නුම් කරයි. උතුරු  අක්ෂාංශ 6° 12′ – 6° 5′ හා නැගෙනහිර දේශාංශ  80° 31′ – 80°  40′ අතර පිහිටා ඇත. වර්ෂය පුරා පැතිරුන  වර්ෂාපතනය 2200 mm – 3000mm පමණ වන අතර තෙත් දේශගුණයක් දක්නට ඇති නිසා තෙත් කලාපීය සදාහරිත වනාන්තර දක්නට ලැබේ.

කොට්ඨාසයේ ප්‍රධාන  ජල ධාරාව  කිරම ආර වන අතර, එය හම්බන්තොට දීස්ත්‍රික්කයට අයත් රම්මලේ කන්දෙන් ආරම්භව වරාපිටිය වැව හරහා කොට්ඨාසයේ ඊසාන  දිග කොටසින් මුලටියනට ඇතුල් වන අතර, කොට්ඨාසයේ කෙත් වතු සරු කරමින් ගලා ගොස් කොරඹුරුවාන ග්‍රාම නිලධාරි වසමෙන් කොට්ඨාශයෙන් පිටවේ.  කොස්ගහදොල, පුවක්දොල, ඌරුමුතු ඔය, ආදියෙන් ප්‍රධාන ජල ධාරාව පෝෂණය වේ.  මෙම කොට්ඨාශයේ  ශාකීය ජල වහන රටාවක් දක්නට ලැබේ.

115.3 km² ක් පමණ වූ මෙම බල ප්‍රදේශය  ග්‍රාම නිලධාරි වසම් 48 කින් සමන්විතය. පරිපාලන ඒකකය වයඹ, උතුර හා ඊසාන කොටස් කඳු ගැටවලින් ගහන ප්‍රදේශයක් වන අතර නැගෙනහිර හා ගිණිකොණ  දිග කොටස කුඩා කඳු ගැට හා ගංගා නිම්නවලින් සමන්විතය. තේ, රබර්, පොල් ප්‍රධාන  ආර්ථික  භෝග ලෙස වගා කරන අතර,  වී වගාවද සාර්ථකව යල මහ කන්න දෙකෙහිදිම සිදුකරයි. වැඩි පිරිසක් තේ සහ කුරුඳු වගාව තුළ ජිවන මඟ සරු කර ගනිමින් සිටී. අතුරු වගාවන් ලෙස  සුළු අපනයන බෝග වන ගම්මිරිස්, කරාබුනැටි ඇතුළු වගාවන්ද  සාමාන්‍ය මට්ටමින් සිදුකරන  අතර ඒ තුලින් මෙම කොට්ඨාශයේ ජනතාව  ජාතික  ආර්ථිකයටද විශාල දායකත්වයක්  ලබාදෙයි.

තෙත් දේශගුණයක් පවතින මෙම  ප්‍රදේශයේ  පළතුරු  වගාව ද  සිදුකෙරෙන අතර, ඒ අතුරින් රඹුටන් ප්‍රධාන තැනක් ගනී.  කෙසෙල්, අලිගැටපේර, ගස්ලබු, ධූරියන් වැනි පළතුරු වගාවන්ටද වඩාත් සුදුසු පසක් පවතින  ප්‍රදේශයකි.